Início
A Associaçom Semente Trasancos nasce em dezembro de 2013 com o objetivo de impulsar a criaçom dum espaço infantil em galego na comarca de Trasancos. Foi fundada por ativistas interessadas em fornecer de futuro à nossa língua e inverter as tristes tendências atuais, por mães e pais que querem oferecer às suas crianças umha opçom de ensino de qualidade, todas nós, pessoas empoderadas que achamos que “a nossa história (e o nosso futuro) fazemo-la nós” e que nas nossas maos estám as ferramentas.
Após reunions abertas com a Semente Compostela e Semente Vigo, deixamo-nos contagiar polo seu entusiasmo e dar o terceiro vértice à rede de Escolas de Ensino Galego. A Semente Trasancos nutre-se das experiências de Compostela e Vigo porque concordamos com os princípios da Semente (coeducaçom, coeducaçom, laicidade, assemblerismo, interaçom com a natureza, respeito pola autoregulaçom da criança, integraçom no contexto do seu bairro e da cidade e na nossa língua), porque neste projeto cabemos todas e, sobretudo, para dar resposta a umha necessidade presente na nossa comarca: ofertar um espaço infantil em galego com princípios pedagógicos transformadores.
Atividades
Mal se formou a Semente Trasancos, iniciou-se a voragem de atividades gratuitas e culturais, orientadas ao público miúdo e com o objetivo de pôr em valor a nossa cultura e a contorna:
Merendamos com O Apalpador, cantamos os Maios, fomos de romaria para festejar as nossas letras, celebramos o Magusto e o Samaím em colaboraçom com o Colectivo Terra de Pontedeume e da Asociación Instructiva de Caamouco, Fomos de roteirinho, e figemos lume no solstício do verám.
Mas, ao longo destes dous anos também nos dedicamos a procurar o local idóneo para a nossa escola, a recadar fundos para o acondicionar e para poder oferecer um serviço de alta qualidade pedagógica sem que recaia diretamente nos petos das usuárias. Organizamos obradoiros, comelhadas, concertos e festivais, e contamos com a colaboraçom altruísta de artistas como Xabier Díaz, Vai Rañala Meu, OsDousDeSempre+1, Leandro Lamas e Antón Cortizas. Acompanharom-nos conta contos como Pablísimo e Paula Carballeira, e cantoras como Uxía.
Estivemos em festas, feiras, feirinhas e feirons, vendendo as nossas camisolas originais e brinquedos como as sacas de cores, as sacas de pedras ou o nosso popular EU-EU.
Mas também estivemos nas reivindicaçons em defesa da nossa língua.
Foto: galizacontrainfo.org